Mófuglar og Fossvogdalurinn

Mikið þótti mér leitt að sjá að byrjað var að slá túnin í Fossvogsdalnumí liðinni viku.  Ég þykist vita að hér sé Kópavogsbær að "gera hreint".   Öllu heyinu var sturtað í safnhaug sem síðar var fjarlægður. Sem er svo sem í fínu.  Við viljum hafa fallegt í kringum okkur. 

Ég hugsaði strax: Geta þeir ekki byrjað annarsstaðar svona snemma?

Það sem mér þykir leitt er að mófuglinn er enn með ófleyga unga þarna  eða fuglinn jafnvel liggjandi á eggjum og ég er hræddur um að fáir ungar komist undan.  

Í fyrra þegar slegið var svona snemma júní þá þurkaðist út nánast allt mófuglalíf úr dalnum þar sem nýbúið var að slá.   Sláttuvélin fór alveg út að skurðbökkum þar sem fuglarnir eru oft með hreiðrin sín í þúfum. Þarna er t.d. hrossagaukurinn, lóa, stundum spói og fleiri mófuglar.

Ég spyr:  Er nauðsynlegt að slá svona snemma?  Mætti ekki bíða með þetta þangað til að ungarnir geta bjargað sér undan sláttuvélinni?

Ég skil vel að bændur þurfi að slá þegar þeim finnst tími til.   En að slá "túnin" í Fossvogsdalnum er óþarfi svona snemma.

Má ekki hafa þúfur í dalnum?  Þar er skjól fyrir smáfuglinn. 

Það er ekki nauðsynlegt að hafa allt malbikað eða ræktað og slegið.  Nær væri að útbúa meira skjól í dalnum fyrir þessa tegund af fuglum. Ein leiðin að leyfa þúfum að vera í friði.  Útbúa mætti litla hóla.

Það er ekkert yndislegra en að ganga út í náttúrunni og hlusta á fuglasöng.  Mófuglarnir í Fossvogsdalnum setja sterkan svip á svæðið.

Smá fróðleikur um Bítlanna

Svona smá í viðbót um Bítlanna.  Vissir þú að það verða 40 ár þann 20. ágúst nk. frá því að félagarnir fjórir unnu síðast saman en þá komu þeir saman til að klára lagið "I Want You (She's So Heavy)  (Abbey Road). En þá komu þeir allir saman í upptökuhljóðverinu í Abbey Road. 

En síðasta nýja lagið sem hljómsveitin hljóðritaði var lagið hans Georgs "I Me Mine" af plötunni Let It Be.  Upptakan fór fram í byrjun janúar 1970 án Lennons sem var þá staddur í Danmörku.

 

40 ár frá útkomu Sgt. Pepper's

Í dag, 1. júní, eru 40 ár liðin frá því tímamótaplata Bítlanna, Sgt. Pepper's Lonely Hearts Club Band, kom út. Þessi plata var númer 8 í röðinni.  Það tók þá 129 daga að vinna við gerð hennar.  Byrjuðu 6. des 1966 og platan kom út 1. júní 1967 í Bretlandi og daginn eftir í USA. 

 " Magnum opus" meistaraverk

 

Skólinn

Jæja það er augljóst að skólarnir eru að ljúka störfum þessa daganna.  Nú þegar sjást unglingar í bæjarvinnunni. Mínir krakkar eru alveg að klára skólann sinn en einhverjar fræðslu- og skemmtiferðir eru á dagskrá í næstu viku. 

Síðasta vikan í skólanum er oft hálf vandræðaleg hjá ansi mörgum. Það er verið að skipuleggja ýmsar uppákomur s.s.  fræðsluferðir, leiki, grill og annað sem ólíkt venjubundnu námi.  Allt gott um það að segja en sumt kostar peninga.   Mér skilst að sumar fræðsluferðir kosti frá 800 kr. rútuferð  upp í 4000 kr. hvalaskoðun.  Hvar endar þetta?

En þeim finnst þetta skemmtilegt og er það ekki aðalmálið? 

   

Árangur

Vissuð þið að það er sterk fylgni milli árangurs og vinnubragða.

Yndislegur morgun

Fór með bílinn í viðgerð í morgun og gekk í vinnuna.  Loksins fann maður að sumarið er komið.  Helgin var að vísu mjög fín, sól og fallegt en samt var frekar kalt í lofti.  En í morgun var lofthitinn greinilega hlýrri.  Vonandi fáum við fleiri svona morgna í sumar

Sauðburður og tófan

Sá áðan í fréttum að tófa hefur lagst á nýfædd lömb.  Þar var sagt að nú þegar sé búið að skjóta 8 tófur á svæðinu en drápin á lömbum stoppa ekki.  Það er því greinilegt hér er dýrbítur á ferð sem veldur þessum óskunda.  Sært eða gamalt dýr.

Þegar ég var yngri

Það er annars alveg merkilegt hvað þarf oft að segja krökkum hvað sé hægt að gera sér til dundurs nú til dags án þess að það kosti peninga.  Oft kemur fyrir að þegar stákurinn minn nennir ekki að fara út með vinum sínum þá ber hann því við að það sé ekkert hægt að gera úti.  Jú, að vísu fer hann oft í  fótbolta og körfubolta, á hjól eða hlaupabretti. En ef þessi upptalning er ekki áhugaverð þá verður oft erfitt um vik.   Þegar ég var ungur (sem ég er enn) þá var alltaf eitthvað hægt að gera eða finna upp á einhverju nýju. (já já ég veit að sumir muna meira en ég).  Ég á kannski eftir rifja upp síðar hvað ég og vinir mínir gerðum heima á Reyðarfirði.   Sigurbjörn bróðir minn skemmtir sér og örðum ansi oft með frásögnum af mér þegar hann þarf að segja frá einhverju spaugilegu.   Annars held ég að hann bæti ansi miklu við frásöguna.   En hvað um það.  Ef rigndi þá var oft farið út að stífla læki sem mynduðust á götum. Reynt að búa til stórar (Kárahnjúka) stíflur.  Eins var vinsælt að smíða trébíla með góðum fjöðrum og reynt að líkja eftir alvöru bílum og sjá hvað þeir þyldu mikinn halla. Bestu bílarnir þóttu þeir sem var hægt að sléttkeyra yfir holóttar götur með fullfermi. Ég man alltaf eftir því þegar Einar bróðir minn smíðaði fyrsta bílinn handa mér og kenndi mér að búa til fjaðrir undir hann.  Eftir þetta áttu allir vörubílar að vera eins og bílarnir í Árbæ eða GSM trukkarnir hjá KHB og ég tala nú ekki um Man trukkanna sem kaupfélagið átti.  Í dag er öllu reddað með því að fara út í búð og kaupa leikföngin.   Ég þekki vel þegar eitthvað æði grípur krakkanna og allir þurfa að eignast þetta og hitt. Þegar Hringadrottinssaga var sýnt. Þá þurftu allir að eignast sverðin eða boga eins og hetjurnar í myndinni notuðu. Sverðin í Hringadrottinssögu voru vinsæl og gott dæmi um þetta.  Auðvelt að redda. Bara farið í út í búð og keypt eitt stykki plastsverð. Þegar strákurinn minn vildi eignast eins sverð og Aragon var með í umræddri mynd þá var að sjálfsögðu skundað út í búð. En því miður var sverðið annaðhvort uppselt eða fékkst ekki. Ég varð því að drattaðist niður í kjallara og smíða eitt stykki sverð eftir nákvæmum lýsingum hjá kappanum unga og viti menn: Sverið þótti það flottast af öllum sverðum á svæðinu. Vafið með leðri og bandi og smíðað úr tré en ekki eitthvað plastdraslsverð.  Þannig að margt gott fólst í þessu.  Ég drattaðist til að gera eitthvað fyrir hann. Svo var þetta einfalt og ódýrt en um leið skemmtilegt fyrir krakkanna. (Mig líka)  Þess má geta að sverðið er ennþá til í dag og stráksi passar það eins og gull.  En ég er ekki viss um að hann hefði passað plastsverðið svona vel. (keypt úr búð)?

 

Lennon píanó

Píanóið hans Lennons er á  ferð og flugi um heiminn en trúlega engin fær að spila á það.

Jæja, nú á að prófa að blogga smávegis

Datt í hug að prófa að blogga eins og öll hin.  Sjá hvernig þetta virkar.  Kannski á ég eftir að skella inn myndum.    En annars er þetta mest til að bulla og hafa gaman af.  Alltaf þegar sól skín þá verður allt svo skemmtilegt.

Flestir virðast hafa skoðun á öllu og ætli ég sé ekki eins.   Vera bara nokkuð sáttur við nýja ríkisstjórn. Hún er alla veganna ekki búin að gera neitt af sér ennþá he he.   Eða eigum við ekki að bíða og leyfa henni að láta verkin dæma hana?

Fór í útskriftarveislu hjá Möggu frænku minni í gær og það var gaman. Mikið hlegið og skrafað.

Sumarið leggst vel í mig.  Stefni að því að fara með strákinn á fótboltamót í sumar en hann er að blómstra í boltanum. Þetta hefðbundna ár eftir ár, fara austur, ganga í fjöllum á fullu, mála og bara gera ekki neitt.