Ný tækifæri á lóninu við Kárahnjúka?

Ég skellti mér um daginn í smá ferð inn að Kárahnjúkum og skoðaði mannvirkin þar og hið nýja lón sem þar er að myndast.  Þegar ég sá þetta stóra stöðuvatn þá varð mér hugsað til frænda míns Hrafns á Hallormsstað.    

Í bókinni "Hrafn á Hallormsstað og lífið í krinum hann" eftir Ármann Halldórsson talar Hrafn eða Krummi eins og hann var alltaf kallaður af vinum, um LSD og ferðamannaiðnað á virkjunarsvæðinu.

LSD Lang Stærsti Draumurinn var það oft kallað þegar verið var að ræða um stórvirkjun í Fljótsdal árið 1970 en þá stóð til að virkja Eyjabakka með því að gera stíflu þvert yfir Norðurdal milli Eyjabakka utan til og Snæfellsness en á Eyjabökkum er einstakt gróðurlendi. Sem betur fer var fallið frá þeirri hugmynd. Held að tæknin (tæknileysið) hafi komið í veg fyrir þessa hugmynd.  Ef af hefði orðið þá hefði myndast stórt stöðuvatn álíka stórt og Þingvallavatn sem hefði náð inn að Eyjabakkajökli.  Eyjabakkar eru að mínu mati mun mikilvægari fyrir bæði gæs og hreindýr en þar sem Kárahnjúkalónið er í dag.

Krummi eins og Hrafn var alltaf kallaður sá fyrir sér mikla möguleika í ferðamannageiranum þarna með tilkomu stöðuvatnsins (Eyjabakkalón).

Hann sá fyrir sér "......skýjaborgir um atvinnuveg þarna innfrá að mannvirkinu loknu, þ.e. ferðamannaþjónustu á heimsmælikvarða".   Hann sá fyrir sér sundlaug við Hafursfell.  Hann vildi sjá ferjuskip á Eyjabakkalóni sem siglir inn að jökli að sumarlagi svo eitthvað sé nefnt. Hrafn var mikill náttúruunnandi og var öllum stundum inná heiðum Norðan jökuls.

Þegar ég kom að nýja stöðuvatninu á dögunum, norðan við Kárahnjúka þá sá ég á stundinni að þarna var komið tækifærið sem Krummi var að tala um.  

Það er ekkert svart og hvítt í náttúruvernd.   Ég hef stutt þessa virkjun og tel hana mikilvæga fyrir Austfirðinga sem og aðra landsmenn.  Það á að notfæra sér þessa virkjun og vegi í tengslum við ferðamannaiðnaðinn. En auðvitað hefur miklu verið fórnað og ég veit að margir eru sárir út í þessar framkvæmdir  en ég tel réttlætanlegt að nýta öll tækifæri sem eru til staðar og þetta er ein leið til þess.

Á nýja lóninu innan við Kárahnjúka hefur myndast ný eyja. Sjá myndir

Legg til að nýja lónið verði látið heita í höfuðið á Hrafni

Nú er bara að sjá hvort ekki verði keypt ferja á lónið og byggt svona eitt stykki hótel?

Nú er skoo sumar

Jæja best að vera úti við og njóta sumarsins á meðan það varir.   Sumarið er ca. frá 20. júní fram yfir verslunarmannahelgi.  úfffff hvað þetta er stutt    Var einhver að tala um rigningu?  Neeeee

Húsin á Mjóeyri við Eskifjörð

Ég var að skoða myndasafn Helga Garðars frá Eskifirði áðan og rakst á ljósmynd sem Helgi hafði tekið rétt innan við Mjóeyri sem er frægur tangi utan við Eskifjörð.  Búið er að koma fyrir nokkrum húsum á tanganum sem mér skilst að þjóni ferðamönnum sem vilja gista á staðnum. Gott og vel.  Það er örugglega gott að gista þarna og hvað er betra en að vakna við sjávarilm og fuglasöng í sumarfríinu.   En var ekki hægt að velja húsunum betri stað?

Mér finnst ljótt hvernig þessum húsum hefur verið raðað á eyrina.   Var ekki hægt að hafa þessi hús t.d. nær fjallshlíðinni svo þau væru minna áberandi?  Til eru margar mjög fallegar myndir af Mjóeyrinni með Hólmaborgina eða þoku í baksýn.  Póstkortadæmi.  

Mér finnst frábært að fólk bjargi sér og sýni frumkvæði í ferðaþjónustu og ég tek fram að ég hef alls ekkert á móti framtaki eiganda húsanna, nema fyrir utan staðsetningu þeirra.   Mér skilst þarna sé orðin töluverð uppbygging og gangi vel sem ber að sjálfsögðu að fagna.  

 Mynd án húsanna.     Mynd með húsunum. 

Einum mikið annt um póstkortaljósmyndun

 

 

Rauði krossinn

Má til með að vísa á blogg URKÍ-R eða ungmennadeild Reykjavíkurdeildar Rauða kross Íslands en þar er gott innlegg sem öllum er hollt að lesa og hafa í huga.

Ungmennadeild Reykjavíkurdeildar Rauða kross Íslands 

 

 

 

Er umhverfisvænt að aka yfir hraðahindrun?

Allir sem aka um götur Kópavogsbæjar þekkja hvössu og háu hraðahindranirnar sem þar eru.

Auðvitað eru hindranir nauðsynlegar.  Eins og nafnið gefur til kynna; hraðahindrun.

En hvað um hraðahindranir t.d. í Reykjavík?  Virka þær þá ekkert? Þær eru mun mýkri.

Ef hámarkshraðinn er t.d. 30 km í götu þá á að virða hann.  Ég held að því miður aki flestir of hratt á milli hindrana og bremsi rétt áður en komið er að þeim en auki síðan hraðann þangað til að komið er að næstu hindrun.

Að sjálfsögðu verður aldrei hægt að meta mannslíf og þessar hindranir eru til að koma í veg fyrir slys og virka sem líkar.

En hvað skyldi það kosta fyrir þjóðfélagið að aka yfir þessar hindranir á ári?  

 Nú spyr einhver ef einhver les þetta: Hvað meinar hann? 

Það hlýtur að vera dýrt að vera alltaf að bremsa og gefa svo aftur í (eyðsla) og einnig óþarfa álag á fjöðrunarkerfi bílsins.  Helsti kostnaðurinn: Eldsneyti, bremsur og fjöðrunarbúnaður.  Hávaði í næsta nágrenni við hindranirnar og  þar að auki mengun.

Dæmi 1:  Gata með 50 km hámarkshraða og fjórar hvassar hraðahindranir (Kópavogshraðahindrun).   Ökumaður A ekur á milli hraðahindrana á 50 km hraða og hemlar rétt áður en hann ekur yfir hindrunina og eykur strax hraðann að næstu hindrun.  Hann þarf að aka fjórum sinnum með svona aksturslagi.   

Dæmi 2: Gata með hámarkshraða 50 km og fjórar mjúkar hraðahindranir (Reykjavík).  Ökumaður ekur með jöfnun hraða en hægir aðeins á meðan hann ekur yfir hindrunina.   Lítil hraðbreyting og lámarks bremsunotkun.

Ég held að það sé betra að nota ljósatöflur sem sýnir ökuhraðan samhliða mjúkum hraðahindrunum.  Umhverfisvænni akstur þar að auki.

 

Tvær ferjur

Af hverju er ekki keypt önnur stór ferja?  Þá væri búið að bæta þjónustuna 100%. 

Tala nú ekki um að hafa þriðju ferjuna. Svoleiðis ferja gæti verið svifnökkvi sem færi hraðferðir eingöngu með farþega.  Íbúar Vestmannaeyjar eiga skilið góðar samgöngur.

Eimskip leggur fram tilboð - boltinn hjá Vegagerðinni

Takk Anna

Stundum er lífið skemmtilegt og stundum ekki. Því miður var Anna Inga að hætta hjá okkur í vinnunni og kvöddum við þar góðan vinnufélaga en hún ætlar að flytja til Danmerkur í sumar. Aldrei gaman þegar einhver hættir í vinnunni. En svona er lífið, vinir og vinnufélagar koma og fara en við búum að góðri reynslu öll eftir á.  Þetta átti nú ekki að vera mjög væmið hjá mér  eða þannig.  Hafðu það gott í Danaveldi Anna mín.

Frábærir tónleikar í Höllinni

 Í gærkvöldi fórum við fjölskyldan á tónleika í Höllina að sjá Sinfóníuhljómsveit Íslands ásamt hljómsveitinni Dúndurfréttir flytja verkið The Wall eftir Roger Waters og félga í Pink Floyd.   Þetta voru frábærir tónleikar og hin mesta skemmtun.  Ég ætla mér ekki að setjast í neitt dómarasæti enda skemmti ég mér vel. Þó verð ég að skrifa smá.   Einar Þór Jóhannsson er snillingur á gítarinn og spilaði nánast eins og David Gilmour væri staddur á sviðinu. Svei mér þá, ég held að hann hafi náð treganum í gítarnum sem Gilmour var frægur fyrir.  Matthías Matthíasson og Pétur Örn Guðmundsson frábærir í söngnum.     Hörku  band.

Ég hef nú ekki farið oft á tónleika með Sinfóníunni en það er gaman að sjá Bernharð Wilkinson stjórna í svona léttu verki. Hann lifir sig vel inn í þetta.    Verst hvað allir hljóðfæraleikarnir eru alvörugefnir, það sást ekki neinn hreyfa sig í takt við tónlistina.   En þau hafa vonandi haft gaman eins og ég gerði.   Smá óhljóð 2x í hljóðkerfinu. Ég hefði viljað heyra meira af óvæntri útgáfu af verkinu og klassísku hljóðfærin hefðu mátt koma sterkari inn.    Skólakór Kársness var frábær.

En fyrir rokkunnandann var þetta geggjað.  Krökkunum mínum fannst þetta skemmtilegt og þetta kom þeim virkilega á óvart. 

Sem sagt flottir rokktónleikar. Takk Takk.

 

Um farflug gæsa

Ég hef lengi haft áhuga á fuglum og öllu er viðkemur þeim sem og öðrum dýrum þó ég sé stundum hálf fúll út í köttinn eða þannig.       En hvað um það.  Ég var ekki byrjaður að blogga í vor þegar farfuglarnir voru að streyma til landsins en þá hefði þessi pæling passað betur við en núna.

Ég hef oft sagt að við sem búum á höfuðborgarsvæðinu þekkjum ekki þá tilfinningu sem landsbyggðarfólkið þekkir þegar farfuglarnir eru að koma til landsins á vorin. Þar er eins og allt vakni til lífsins.  Oft hef ég ekið austur fyrir fjall til að upplifa þessa tilfinningu á vorin en sleppti því að vísu í vor.  Það kemur annað vor.  Þegar ég var yngri þá fannst mér líka alltaf mikill söknuður á haustin þegar fuglarnir voru að yfirgefa landið. Það var eins og landið sofnaði hægt og rólega.

En af hverju leggjast fuglar í farflug? 

Oft hef ég velt því fyrir mér afhverju fuglar leggi í langt farflug á hverju vori norður á bóginn.  Auðvitað vitum við að þessir fuglar sem koma að vori og fara að hausti, gætu ekki lifað af veturinn hér á landi en fuglar ferðast víðar um heiminn án þess að þurfa að flýja kulda.  Fyrir nokkrum árum las ég grein um farflug fugla (gæsa) í Bandaríkjunum.  Þar kom fram að fuglarnir ferðuðust nánast stanslaust dag og nótt þangað til að þeir náðu á áfangastað. Á meðan á ferðinni stóð þá borðuðu þeir jafnvel yfir hánóttina þó aldimmt væri. 

En hvað ætli valdi því að fuglar, jafnt stórir sem litlir, fljúgi langar leiðir til varpstöðva? Til dæmis frá Evrópu til Íslands á hverju ári?  Margæsin fer enn lengra.   http://www.wwt.org.uk/supergoose/Maps.asp

Af hverju halda þessir fuglar sig ekki bara til á vetrarstöðvunum allt árið um kring?  Gæsin gæti dvalið  á Bretlandseyjum allan ársins hring í stað þess að eyða orkunni í langt og áhættusamt flug?  Tala nú ekki um litlu fuglanna sem verða að fljúga í einum áfanga yfir hafið.

Er möguleiki að þessar fuglategundir hafi í upphafi (fyrir langa löngu) flogið norður í fæðuleit þegar þrengja tók að þeim suður frá?

Við vitum að ungir fuglar fylgja foreldrum sínum suður á bóginn á hverju hausti og svo aftur til baka næsta vor. Kannski má segja að þar sé skýringin komin. En samt ekki alveg.

Ég held að hin skýringin sé að fuglar vilji færa sig norðar eftir því sem birtan færist norðar. (Kannski vissu allir þetta nema ég).  Fuglinn er öruggari að koma upp ungum í birtu en í myrkri.  Það er bjart allan sólarhringinn norðan við heimskautabaug yfir sumartímann.  Krían er t.d. alltaf stödd þar sem sumarið er og eltir sumarið árið um kring.  Um leið og Spóinn er búin að koma upp ungunum sínum þá er nánast blásið til brottfarar suður á bóginn jafnvel þótt mikið sé eftir af sumrinu hér á landi.   

Oft þegar fuglar eru að leggja í hafið þá hefur það komið fyrir að þeir komi til baka og fresta brottför ef vindátt er ekki hagstæð.    Ég hitti mann frá Skotlandi í fyrra sem sagði mér að fuglinn ætti það til á vorin að fara í prufuflug út frá Skosku eyjunum áður en hann legði af stað norður á bóginn.  Gæsir frá Íslandi dvelja oft við Loch Ness vatnið í Skotlandi yfir vetrartímann.  http://www.lochness.co.uk/livecam/

Einnig hef ég heyrt að fuglapör komi á undan geldfuglum og ungfuglum hingað til lands?  Ætli geldfuglinn nenni af stað strax? Svo er ungfuglinn er trúlega á fullu að para sig á vetrarstöðvunum áður en hann leggur af stað yfir hafið.  Þetta kemur sér að vísu vel fyrir pöruðu fuglanna og kemur einnig í veg fyrir samkeppni um þá litlu fæðu sem er í boði svona snemma á vorin á sumarstöðvunum. 

Því held ég að fuglinn velji að verpa og ala unga sína í sem mestri birtu og hægt er og hana er að fá hér norður frá.

Tek fram að þetta eru bara mínar vangaveltur og gaman að spá í þetta.

Góður undirbúningur

Þarna er í fyrsta sinn verið að samhæfa mjög marga ólíka aðila í öllu landinu og verður spennandi að fylgjast með hvernig æfingin mun takast.

Skrifborðsæfing vegna hugsanlegs inflúensufaraldurs fyrirhuguð