Oddaflug

Jæja, nú finnst mér vorið vera komið.  Sá fyrstu gæsirnar á þessu ári koma í oddaflugi inn yfir Reykjavík núna í kvöld  um kl. 21.   Þarna var um  stóran gæsahóp að ræða.  Hafa örugglega verið yfir hundrað gæsir.  Þar sem þær komu fljúgandi úr suðri yfir höfuðborgarsvæðið, þá geri ég ráð fyrir að þær hafi komið upp að landinu við Reykjanes. Hafa trúlega eitthvað borið af leið vegna vindátta.  Þær flugu hátt yfir og sveigðu svo upp í Mosfellsdalinn. Það má reikna með að þær hafi verið búnar að vera á stanslausu flugi í ca 30- 40 tíma, frá því að þær lögðu af stað frá Bretlandseyjum.   

Algengast er að farfuglar komi fyrst upp að landinu á svæðinu frá Lóni og suður í Vík en vindáttir bera þá oft af leið.

John Lennon, Eric Clapton, Keith Richards

Draumabandið sem spilaði bara eitt lag saman, "Yer Blues".

Tekið sennilega upp 11. desember 1968 fyrir the Rolling Stones Rock n Roll Circus?

Fuglalíf í miðbænum

Ég þurfti að skreppa niður Laugaveginn nú í kvöld en umferðin var óvenjulega mikil og gekk seint. Það kom í ljós af hverju svo var.   Neðst á Laugaveginum var ungur smyrill að gæða sér á dauðum fugli á gangstéttinni og það var ekkert sem haggaði honum enda stoppuðu allir til að horfa á aðfarirnar og það í niðamyrki.

Ég hef oft og mörgum sinnum séð bæði smyril og fálka veiða og matast og undrast alltaf hversu gæfir þessir fuglar eru við "matarborðið".    Það var engin undantekning á í kvöld.  Fólk var alveg ofan í honum en fuglinn hélt áfram að éta eins og ekkert væri.   

 Ég man alltaf eftir frásögn sem afi minn á Reyðarfirði sagði mér þegar ég var ungur. Afi var einu sinni að vinna við húsbyggingu og sér þá hvar rjúpa kemur svífandi að húsinu og stingur sér inn um kjallaraglugga og rétt á eftir henni kemur fálki.   Fálkinn sest í gluggasylluna og starir á rjúpuna sem hnipraði sig saman undir tjörupappa sem var inn í herberginu.  Afi sagðist hafa gengið að fálkanum og gripið utan um hann en fálkinn tók varla eftir því, svo fast starði hann á rjúpuna.   Svo þegar honum var sleppt stuttu síðar þá ætlaði hann aftur að setjast í gluggann en áttaði sig og flaug í burtu.

Jeppadella

Hef stundum látið hugann reika og spáð í jeppakaup.   En auðvitað er það bara tóm tjara nú á dögum, þar að auki búandi í Kópavogi, þar sem aldrei festir snjó.    Ferðast í mesta lagi í vinnunna á bíl. 

Þannig að ég lét bara breyta litla nýja bílnum mínum og ek nú á hálfjeppa-hálf-sparibauk.   

Get kannski sýnt þessum trukkatöffurum að ég sit jafn hátt uppi og þeir.      

Hver ræður núna?

Fyndið en kannski ekki?

Þótt það sé að komið vor þá get ég ekki stillt mig og sett hér inn skondna mynd sem ég fann á netinu.   

En ég er næstum viss um að flest öll börn sem flugu með þessari vél, hafi því miður farið að hágráta þegar þau gengu út úr henni og sáu hvernig komið var fyrir sveinka.   

Hlýtur að hafa eyðilagt spennandi flug hjá þeim svona rétt fyrir jólin.

Byggjum brú yfir Sundahöfn

Meira hvað menn velta þessu fyrir sér.    Hættið þessu jarðgangatali og byggið brú.  Jarðgöng eru bæði dýrari og líka hættulegri, sérstaklega hvað varðar eldhættu.     Það er hægt að nota þessa milljarða sem sparast í eitthvað annað.

Ólíklegt að Sundabraut fari í útboð í ár

Að hafa valkost

Rakst á heimasíðu með lista um það sem hefur mest áhrif á líf okkar.    Major Life Changes

Auðvitað kostar þetta allt. 

http://www.higherawareness.com/lists/major-life-changes.html

 

Geymsluþol á eggjum

Fór út í búð áðan.  Hljómar eins og ég hafi aldrei farið áður þangað.    jú, að vísu fór ég fótgangandi. 

Hvað um það.  Eitt af því sem ég verslaði, voru hænuegg (aldrei séð hanaegg).   Auðvitað fór ég að gramsa í hillunni eftir pakka sem hefði lengstu geymsluþolsdagsetninguna.  Tók eftir því að 6 stk. í pakka höfðu dagsetninguna til 4. apríl en 10 stk. höfðu geymsluþol til 11. apríl en voru pökkuð á sama degi.    Merkilegt. (Lesist ekki sem sex egg í pakka). 

Geymast þá egg lengur eftir því sem þau eru fleiri saman eða er það bara af því að maður er lengur að klára úr stærri pakkningunni en þeim minni?   nei, bara spyr. 

Neil Aspinall rótari og vinur Bítlanna látinn

Einn af þeim sem komu hvað mest við sögu hjá Bítlunnum, Neil Aspinall, er látinn.   Eins og kemur fram á mbl.is þá var Neil ein aðal gæinn sem hélt Bítlunum saman og einn af þeim fáu sem reyndist vinur þeirra allra sem og auðvitað George Martin og Malcolm 'Mal' Evans (f. 27. maí, 1935 - d. 5. jan. 1976) sem var aðal framkvæmdastjórinn, rótari, lífvörður og vinur þeirra og fylgdi þeim allan ferilinn.

Neil var í sama bekk og Paul McCartney þegar þeir voru 12 ára en það var George sem kom honum að sem starfsmanni (fyrst sem bílstjóri).   Neil ætlaði að hætta að vinna með sveitinni þegar Pete Best (trommari) var rekinn úr henni af Brian Epstein og Ringo var ráðinn í staðinn.  Ég las einhversstaðar að Pete Best hefði hvatt Neil til að vera áfram með Bítlunum en Neil var mjög ósáttur við þetta.   Þess má geta að Neil eignaðist barn með Monu Best, systur Pete.    Lítill heimur.  

Neil Aspinall látinn