Fuglalíf í miðbænum

Ég þurfti að skreppa niður Laugaveginn nú í kvöld en umferðin var óvenjulega mikil og gekk seint. Það kom í ljós af hverju svo var.   Neðst á Laugaveginum var ungur smyrill að gæða sér á dauðum fugli á gangstéttinni og það var ekkert sem haggaði honum enda stoppuðu allir til að horfa á aðfarirnar og það í niðamyrki.

Ég hef oft og mörgum sinnum séð bæði smyril og fálka veiða og matast og undrast alltaf hversu gæfir þessir fuglar eru við "matarborðið".    Það var engin undantekning á í kvöld.  Fólk var alveg ofan í honum en fuglinn hélt áfram að éta eins og ekkert væri.   

 Ég man alltaf eftir frásögn sem afi minn á Reyðarfirði sagði mér þegar ég var ungur. Afi var einu sinni að vinna við húsbyggingu og sér þá hvar rjúpa kemur svífandi að húsinu og stingur sér inn um kjallaraglugga og rétt á eftir henni kemur fálki.   Fálkinn sest í gluggasylluna og starir á rjúpuna sem hnipraði sig saman undir tjörupappa sem var inn í herberginu.  Afi sagðist hafa gengið að fálkanum og gripið utan um hann en fálkinn tók varla eftir því, svo fast starði hann á rjúpuna.   Svo þegar honum var sleppt stuttu síðar þá ætlaði hann aftur að setjast í gluggann en áttaði sig og flaug í burtu.

Athugasemdir

[Anna Beee (IP-tala skráð) 5.4.2008 kl. 14:46]

Þennan hungraða smyril má sjá á forsíðu Moggans í dag.  Mögnuð mynd úr miðborginni.

[Kristín M. Jóhannsdóttir, 5.4.2008 kl. 18:13]

Veistu ég hef aldrei séð íslenskan fálka. Ég hef séð smyril nokkrum sinnum, og uglu nokkrum sinnum (short eared owl - man ekki hvað hún kallast á íslensku), en aldrei fálka. Er ekki einu sinni viss um að ég hafi séð fálka hér í Kanada en aftur á móti endalausa erni og hauka af ýmsum gerðum. Við eigum þó að hafa þrjár fálkategundir hér, peregrin falcon, prairie falcon og gyrfalcon (sem ég held að sé sá sami og heima). Hér eru hins vegar miklu fleiri tegundir af uglum en þessar tvær sem við höfum séð heima. Það er þó ekki alltaf auðvelt að sjá þær. Held að ég hafi bara séð fjórar tegundir, en verð þó að nefna að ég sá þrjár þeirra sama daginn. Snowy owl, Hawkowl og Great horned owl. Það var af því að fuglaáhugamaður bauð mér í ugluskoðunarferð og hann vissi hvert átti að fara til að finna þær.

Í Manitoba fór ég oft í fuglaferðir en hér í BC hefur það aldlrei gerst. Bæði af því að ég á engan bíl og því erfiðara að fara út fyrri borgarmörkin og eins af því að hér er fuglalíf einfaldlega ekki eins spennandi og það er í Manitoba.

En þetta var nú löng athugasemd um þessa skemmtilegu sögu frá þér um smyrilinn. Vissirðu annars að smyrill kallast á ensku 'american kestrel'. Allt þurfa þeir nú að eigna sér. Annars eigum við svo sem 'Iceland gull' sem þó er bara farfugl á Íslandi, og svo er það Kanadagæsin sem auðvitað finnst miklu víðar en hér. 

[Marinó Már Marinósson, 5.4.2008 kl. 22:23]

Anna mín!   Ég vildi ekki skemma "skúbbið" fyrir Mogganum og ákvað að sýna ekki myndina af fuglinum.     

Kristín!   Íslenski fákinn heitir á latínu Falco rusticolus og smyrill er Falco coumbarius ef það hjálpar þér eitthvað að bera saman tegundir hér og á þeim slóðum sem þú ert á.   Hér er listi yfir heiti á fuglum bæði á á íslensku og ensku.   http://www.hi.is/~yannk/1111.htm 

Tvær uglur eru á Íslandi. Brandugla, Asio flammeus  og Snæugla, Nyctea scandiaca sem er sjaldgæf á Íslandi.

 Einu sinni þegar ég var ungur þá sást flækingur á Reyðarfirði og töldu menn að sá fugl væri af haukaætt og líklega væri í fyrsta sinn á Íslandi.  Þá var hrint í dr. Finn Guðmundsson fuglafræðing og í Náttúrufræðistofnun og spurt ráða.  Liðu nokkrir dagar þar til að ákvörðun kom að sunnan um að skjóta þyrfti fuglinn til að láta rannsaka hann. Í þá daga þótti eðlilegt að skjóta fugla ef þurfti að rannsaka nánar.  Auðvitað var pabbi fenginn í verkið enda ráðin skytta á vegum sveitafélagsins ásamt Steingrími Bjarnasyni. Þar að auki höfðum við fylgst með ránfuglinum af miklum áhuga og vissum nákvæmlega hvar hann var.  

Svo var lagt af stað. Með í för var Steingrímur, eldri bróður minn og  hreppsstjórinn á staðnum svona til að allt væri nú löglegt.     Fljótlega gekk að veiða haukinn en hann var skotinn þar sem hann sat ofan á símastaur.  Auðvitað átti svo að mynda bráðina en pabbi var fréttaritari og þarna var komin frétt.    Þegar dauðir fuglar eru myndaðir þá eru er þeim oft stillt upp með útþanda vængi.   En hann reyndist vera með svo stóra vængi að það þurfti tvo til að breiða þá út.   Hreppstjórinn var hár maður svo það dæmdist á hann að halda uppi öðrum vængnum og ég var minnstur svo ég þurfti að halda í hinn vænginn og toga í fuglinn niður á ská til að sýna hvað hann var stór.   Síðan var fuglinn myndaður bak og fyrir ásamt fyrirsætunum tveimur.  Nokkrum dögum síðar birtist myndin; bæði í Tímanum og Morgunblaðinu. Okkur strákunum þótti svo sem ekkert varið í fuglinn lengur, heldur rákum við augun í risa stóra saumsprettu undir handlegg hreppsstjórans en hann var í köflóttri vinnuskyrtu svo rifan blasti við og ég í gúmmístígvélum með aðra buxnaskálmina uppúr.   Við bræður hlægjum enn í dag af þessu en þess má geta að umræddur hreppsstjóri var mjög skemmtilegur maður og hafði gaman af allskonar uppátækjum sjálfur.    

[Herdís Sigurjónsdóttir, 6.4.2008 kl. 08:50]

Myndirnar takk Marinó ....

Frábær færsla og hefði ég viljað vera með í fuglaskoðunarferð á Laugaveginum. Ég var einmitt einu sinni að keyra og var næstum búin að keyra á "sjónlausan"fálka í veiðiferð . Mér datt í hug þegar var talað um ernina í Kanada að ég var lengi að venjast því að sjá skallaerni eins og hrafna í Alaska. Ótrúlega flottir fuglar.

[Marinó Már Marinósson, 6.4.2008 kl. 11:24]

Afsaka smá prentvillur í færslu á undan.   Ætlaði að segja t.d.   "Þá var hringt í dr. Finn Guðmundsson...."

Já ég hef séð skallaörininn í Alaska, og það ekkert smá fjölda.  "Sjónlausan"fálka?  Sá hefur verið út á þekju greyið.    

[Kristín M. Jóhannsdóttir, 6.4.2008 kl. 19:44]

Brandugla er nafnið sem ég mundi ekki. Ég veit að uglurnar tvær á Íslandi eru þær sem hér kallast snowy owl og short eared owl. Hins vegar man ég núna að smyrillinn er ekki American Kestrel heldur hinn 'litl' ránfuglinn, merlin. Hefði átt að muna það því tveir kennarar mínir sem eru miklir fuglaáhugamenn (ja, hann, hún ekki svo) skýrðu son sinn Merlin. Það er eins og að kallast strák Smyril! Kannski ekki skrítið fyrst við höfum Haukur, Valur, Svanur, o.s.frv.

Ótrúlegar aðferðir við fuglaskoðun þarna í 'gamla daga' þegar þú varst enn ungur, hehe. 

[Marinó Már Marinósson, 6.4.2008 kl. 21:04]

Fyndið með nafnið á syninum.    Popparar hafa skýrt skýrt börnin sín Lennon svo þetta er þekkt. 

Já þetta með fuglaskoðunina í den.  Ætli þeir hjá Náttúrufræðistofnun hafi ekki langað að telja fjaðrir og því skipað að fuglinn skyldi líflátinn?     

og ma er ungur enn..