Af ljósastaurum og bæjarstjórum

Tók mig til og skrifaði viðeigandi yfirvöldum í borginni bréf og bað þau vinsamlegast að koma sér hingað og laga ljósastaurinn sem er hér beint fyrir framan húsið mitt.  

Málið er, að fyrir mörgum árum bjó hér náugni í stigaganginum,  á neðstu hæðinni, sem skrifaði sömu yfirvöldum bréf, og heimtaði að skipt yrði um þennan staur því hann truflaði sig svo mikið þegar hann væri að horfa á fréttir.   Ljósið barast inn um gluggann. 

Þetta hefur alltaf pirrað mig enda eini staurinn sem er með ljósatýru fyrir lítinn göngustíg.   Hef verið að horfa út þegar myrkrið hellist yfir og sé að minn staur er miklu lélegri en hinir staurarnir.   Það gengur ekki að hér sé myrkur enda enginn snjór til að spara lýsingu. 

  Þannig að ég skrifaði bréfið og bað um að þessu yrði kippt í liðinn STRAX. Nú er að bíða og sjá hvort þetta virkar.    

Ekki það að ég sé bjartsýnn á að bæjaryfirvöld séu snögg til. Drengurinn minn skrifaði Gunnari bæjarstjóra í Kópavogi einu sinni bréf og bað um hjólabrettapall á svæðið en fékk aldrei svar.   Gunnar hefur kannski metið það svo að þarna væri ekki atkvæði á ferð og ekki séð ástæðu að svara drengsa. 

Já ég sá að Kópavogsbær auglýsir viðtalstíma bæjarfulltrúa:  Gunnar er til viðtals kl. 18-19 þann 20. nóvember nk..  Ekki var það nú mikill tími.  Ein klukkustund! 

Athugasemdir

[Hrönn Sigurðardóttir, 18.11.2008 kl. 08:34]

Ein klukkustund - og sú klukkustund þegar flestir eru á leið heim úr búðinni að elda mat!!

Gott framtak hjá þér

[Marinó Már Marinósson, 18.11.2008 kl. 08:53]

Kannski klókur eða raunsær bæjarstjóri? 

[Herdís Sigurjónsdóttir, 18.11.2008 kl. 09:31]

Sæll félagi

Já það er ótrúlegt hvað hægt er að hringla með svona. Það hefur sýnt sig að það eru alltaf sömu perurnar sem "eyðileggjast óvart" í staurunum og oftar en ekki eru það staurar sem eru í bakgarði fólks... en íbúar virðast ekki hugsa um litlu gormana sem eru að labba eftir myrkum göngustígum.

En tu tu, gangi þér vel með lýsinguna.

Hér í Mosfellsbænum eru viðtalstímarnir milli kl.17 og 18, en síðan getur fólk hringt allan sólarhringinn.

[Fanney Björg Karlsdóttir, 18.11.2008 kl. 09:57]

Iss... þá held ég að það sé betra að vera í Ásahrepp.... á hlaðinu hjá mér eru tveir ljósastaurar.... og það sem meira er...inni í húsinu mínu er rofi þar sem ég get kveikt og slökkt á ljósastaurunum allt eftir eigin geðþótta......"Það er gott á þig að búa í Kópavogi..."

[Marinó Már Marinósson, 18.11.2008 kl. 10:24]

Herdís!   Viðtalstímar alla daga?     Það sem pirraði mig var að þeir skiptu út kúpli sem var gerður fyrir götulýsingu og settu minni kúpul fyrir göngustíg og hann gefur minni birtu.    

 Fanney!    Ertu bara ekki alltaf að fikta í takkanum?   Síðast þegar ég átti leið í gegnum hreppinn, (tekur að vísu ekki langan tíma að keyra í gegnum hann)  þá var alltaf að kvikna og slökkva á öllum ljósum í sveitinni. 

Víst er gott að búa í Kópavogi,.........  enda veistu það best. 

[Hrönn Sigurðardóttir, 18.11.2008 kl. 13:27]

Fanney! Geturðu slökkt ljósin á ljósastaurunum?

[Marinó Már Marinósson, 18.11.2008 kl. 13:39]

Já þessir rafvirkjar í sveitinni.  Kunna greinilega ekkert. 

[Fanney Björg Karlsdóttir, 19.11.2008 kl. 17:37]

Jáááá Hrönn.... ef ég vil td skoða stjörnurnar...þá slekk ég bara á ljósastaurunum...... ekkert mál.....

[Marinó Már Marinósson, 19.11.2008 kl. 19:41]

Já Hrönn,  Ég held að hún ofnoti þennan hnapp.  Takkaóð enda verður hún að hafa eitthvað að gera þarna í sveitinni.